Amo 7 | NdeIBE | STEP | Nanku engakutshengiswa nguJehova Wobukhosi: Wayelungisa imitshitshi yezintethe emva kokuvunwa kwesabelo senkosi khonapho amabele esibili esakhula.

Amos 7

Intethe, lomlilo lentambo yokuqondisa

1 Nanku engakutshengiswa nguJehova Wobukhosi: Wayelungisa imitshitshi yezintethe emva kokuvunwa kwesabelo senkosi khonapho amabele esibili esakhula. 2 Kwathi lapho ilizwe seziliphundlile, ngamemeza ngathi, “Jehova Wobukhosi, thethelela! UJakhobe angaphepha kanjani? Mncinyane kakhulu!”

3 Ngakho waxola.

4 Nanku engakutshengiswa nguJehova Wobukhosi: UJehova Wobukhosi wayememezela ukwehlulela ngomlilo; womisa ulwandle waqothula lelizwe.

5 Ngakho ngamemeza ngathi, “Jehova Wobukhosi, ngiyakuncenga, ake ume! UJakhobe angaphepha kanjani na? Mncinyane kakhulu!”

6 Ngakho uJehova waxola. “Lokhu lakho akuyikwenzakala,” kwatsho uJehova Wobukhosi.

7 Nanku angitshengisa khona: UJehova wayemi phansi komduli owawakhiwe waqonda nqo ephethe intambo yokuqondisa ngesandla sakhe 8 UJehova wasengibuza esithi, “Kuyini okubonayo, Amosi?” Ngaphendula ngathi, “Yintambo yokuqondisa.” UJehova wasesithi, “Khangela, ngibeka intambo yokuqondisa phakathi kwabantu bami bako-Israyeli; kangisayikubaxolela futhi.

9 “Izindawo eziphakemeyo zika-Isaka zizadilizwa lezindawo ezingcwele zako-Israyeli zizachithwa; indlu kaJerobhowami ngizayihlasela ngenkemba yami.”

U-Amosi lo-Amaziya

10 U-Amaziya umphristi waseBhetheli wathumela ilizwi kuJerobhowami inkosi yako-Israyeli, wathi, “U-Amosi uceba okubi ngawe khona kanye phakathi kwako-Israyeli. Ilizwe lingeke limelane lawo wonke amazwi akhe. 11 Ngoba u-Amosi uthi: ‘UJerobhowami uzakufa ngenkemba, njalo impela u-Israyeli uzathunjwa, asiwe khatshana kwelizwe lakibo.’ ”

12 U-Amaziya wasesithi ku-Amosi, “Phuma, wena mboni! Buyela elizweni lakoJuda, usebenzele ukudla kwakho khonale wenze lokuphrofetha kwakho khonale. 13 Ungaphrofethi futhi eBhetheli, ngoba le yindawo engcwele kaJehova kanye lethempeli lombuso.”

14 U-Amosi waphendula u-Amaziya wathi, “Mina ngangingasuye mphrofethi kumbe indodana yomphrofethi, kodwa ngangingumelusi, njalo ngigcina izihlahla zomkhiwa wesikhamori. 15 Kodwa uJehova wangithatha ekweluseni imihlambi yezimvu wathi kimi, ‘Hamba uyephrofetha ebantwini bami bako-Israyeli.’ 16 Ngakho-ke khathesi zwana ilizwi likaJehova. Wena uthi: “ ‘Ungaphrofethi kubi ngo-Israyeli, njalo yekela ukutshumayela kubi ngendlela ka-Isaka.’

17 “Ngakho-ke nanku okutshiwo nguJehova: “ ‘Umkakho uzakuba liwule edolobheni, amadoda lamadodakazi akho azakufa ngenkemba. Ilizwe lakho lizalinganiswa labiwe, njalo wena ngokwakho uzafela elizweni lamaqaba. Njalo impela u-Israyeli uzathunjwa asiwe khatshana kwelizwe lakhe.’ ”